माणूस

किती रूपं माणसाची
किती बोलतो हा भाषा
त्याच्या माणूसपणाची
केली त्याने दुर्दशा

असा कसा रे माणसा
तू बदलतो रंग
तुझी किमया पाहुनी
झाला दानवही दंग

नको बाळगू तू वेडया
खोटी अवास्तव हाव
तुला झेपेल अशाच
वाटेवरूनी तू धाव

असता तुझे तुझ्यापाशी
का तू असा वाऱ्यावरी ?
तुझे आयुष्य असे का
झाले उदास,लाचारी

किती करतोस चाळे
किती करशील भोंदुपणा
तुला जमतो कसा रे
जणामधे साधुपणा

जे नाही तुझ्या श्रमाचे
त्याची का तुला अभिलाषा
दुसऱ्याच्या धनावरची
दे सोडूनि तू आशा

एकेकाळचा राम तू
तूच आहेस शिवबा
शोध जरा अंतरी तू
तुझ्या कर्तुत्वाची शोभा